Velkominn á vefsíðu Héraðslistans

Á almenningsbókasafn að vera sem næst háskólasetri eða framhaldsskóla eða félagsaðstöðu eldri borgara eða í miðbænum fyrir ferðamenn eða í grunnskólanum eða í Sláturhúsinu ... eða hvað?

Á tónlistarskólinn að flytjast í Nýung eða á eina deildina á Tjarnarlandi eða í íbúðir bæjarins við Tjarnarlönd eða kannski bara í Fellaskóla eða kannski í kjallarann á Valaskjálf eða á hann kannski bara að vera eitthvað áfram á Selásnum af því að skólinn hefur hvort sem er verið í bráðabirgðahúsnæði í 36 ár?

Kjörnir fulltrúar og fulltrúar í nefndum á vegum sveitarfélagsins eru valdir til þess að taka ákvarðanir af þessu tagi. Fulltrúar framboða deila gjarnan um einmitt þessar ákvarðanir því að í þeim felst ákveðin stefna – ákveðin sýn á það hvernig búið er að stofnunum sveitarfélagsins og hvernig þær vinna best saman.

Þegar ákvörðunin um að byggja við Egilsstaðaskóla var tekin fyrir nokkrum árum - var jafnframt tekin ákvörðun um að ekki yrði gert ráð fyrir starfsemi Tónlistarskólans á Egilsstöðum í húsnæðinu. Þess í stað yrði stefnt að byggingu húsnæðis fyrir tónlistarskólann sem næst Egilsstaðaskóla þannig að samvinna skólanna gæti verið meiri en er í dag og var þá m.a. litið til annarra skóla í sveitarfélaginu þar sem tónlistarskóli er starfræktur innan skólans og þykir gefast vel. Jafnframt var ákveðið að aðstaða fyrir félagsmiðstöð yrði í nýju byggingunni. Haustið 2008 varð að endurskoða ýmsar ákvarðanir – og ein þeirra var bygging tónlistarskóla. Þetta voru mikil vonbrigði enda biðin eftir tónlistarskóla farin að minna á biðina eftir álveri ... Við þessu var þó ekkert að segja.

Þegar mynd var komin á húsnæði Egilsstaðaskóla sáu ýmsir nýja möguleika í stöðunni; það að færa Bókasafn Héraðsbúa í Egilsstaðaskóla; þannig væri hægt að leysa aðgengismál bókasafnsins – sem er vægast sagt afar brýnt - og jafnframt aðstöðu Héraðsskjalasafns og Minjasafns Austurlands en söfnin búa bæði við mikil þrengsli. Auk þess sáu ýmsir kosti þess að fá meiri umferð í skólann fína sem svo margir virtust vera svekktir yfir að var byggður og þannig réttlæta frekar byggingu þessa húss – sem er reyndar óþarfi því húsnæðið hefur þegar sannað gildi sitt í frábærri aðstöðu fyrir nemendur, stórbættri skólalóð og síðast en ekki síst hátíðarsal þar sem nemendur fá loksins tækifæri til að halda skemmtanir í viðunandi aðstöðu.

Málið var lagt fyrir fræðslunefnd 20. október 2009 og nefndin bókaði að hún gerði ekki athugasemd við tímabundinn flutning bókasafnsins í Egilsstaðaskóla en tók þó fram að finna þyrfti framtíðarlausn sem fyrst. Menningar og íþróttanefnd fjallaði um málið 26.október og lagði fram kostnaðaráætlun þ. 26. nóvember. Málið var tekið fyrir í bæjarráði 11. nóvember og samþykkt fjárframlag vegna flutningsins þann 9. desember. Bæjarstjórn samþykkti framlag á fjárhagsáætlun vegna flutningsins þann 16. desember 2009

Á vormánuðum var auglýst eftir sameiginlegum forstöðumanni fyrir bókasafn Héraðsbúa og skólabókasafn Egilsstaðaskóla. Nýr bókavörður var ráðinn og kom hér til að kynna sér aðstæður um miðjan júní. Bókaverðir á safninu fóru að undirbúa flutninginn.

Um miðjan júlí var mér sagt að hætt væri við flutning bókasafnsins. Það var haft eftir starfsmanni á bókasafninu. Þegar ég spurði útí málið á bæjarskrifstofum könnuðust menn ekki við málið. Menningar- og íþróttanefnd hittist eftir kosningar og þar hafði ekkert verið nefnt um mögulega frestun flutningsins. Á fundi nefndarinnar 27.7 var liður sem hafði yfirskriftina „Kynntar hugmyndir um frestun flutnings Bókasafns Héraðsbúa í nýtt húsnæði". Málið var rætt á fundinum en þar sem engin gögn lágu fyrir vísaði nefndin málinu til bæjarráðs. Formaður nefndarinnar virtist ekki þekkja mikið til málsins.

Málið var svo rætt á bæjarráðsfundi þann 11. ágúst sl. og fulltrúar þar töldu að þar sem frestun flutningsins væri orðin staðreynd væri rétt að skoða betur möguleika í stöðunni.

Nú mun fræðslunefnd skoða málið að nýju. Hafi þessi ákvörðun (sem aldrei var samt ákvörðun) verið tekin til þess að koma tónlistarskólanum inn í grunnskólann er það í sjálfu sér ágætt markmið en eins og ég hef rakið hér að framan þá er það stefnumarkandi ákvörðun og það hefur heilmikil áhrif á aðrar stofnanir og starfsemi þeirra. Þarna hefði verið heppilegra að flýta sér hægt. Tónlistarskóli verður ekki fluttur beint inn í húsnæði bókasafns. Þetta myndi kalla á það að breyta þyrfti nýju húsnæði áður en það er komið í notkun. Og allt sem við gerum þessa dagana er jú verðmerkt og á helst ekki að kosta neitt!

Það má samt ekki koma í veg fyrir að fyrst og fremst verði hugsað um þjónustuþegana – þá sem fara á bókasafnið eða stunda nám í Tónlistarskóla - og vinna hlutina frá upphafi í samráði við þá aðila sem koma að málinu í stofnunum sveitarfélagsins og þekkja væntanlega best til aðstæðna.

Það þýðir hins vegar ekkert annað en að skoða alla möguleika úr því sem komið er en ég vil rifja upp það sem kemur fram í málefnasamningi núverandi meirihluta en þar segir m.a.
„Gegnsæi og íbúalýðræði munu verða leiðarstef í starfi meirihlutans ... „ og „Meirihlutinn mun af fremsta megni leitast við að tryggja gott samstarf fulltrúa allra flokka í bæjarstjórn enda þörf á að virkja samtakamátt á erfiðum tímum".

Ég hef verið heima í allt sumar – og tilbúin við símann. Það sá engin fulltrúi meirihlutans ástæðu til að bera málefni bókasafnsins undir mig eða að virkja nokkurn mátt úr mér eða öðrum fulltrúum minnihlutans. Vonandi verður þetta algjört einsdæmi um vinnubrögð sem ekki eiga að sjást nokkurs staðar í stjórnsýslu sem vill láta kenna sig við gegnsæi.

Svo er bara að vona að finnist farsæl lausn á húsnæðisvanda Bókasafns Héraðsbúa og Tónlistarskólans á Egilsstöðum!